Cyfarfu Ei Huchelder Brenhinol, Duges Caerloyw â gwirfoddolwyr St John Ambulance Cymru o bob oed yng Nghaerdydd ar 24 Ebrill, gan glywed am y gwaith gwych y maent yn ei wneud i ddysgu, hyrwyddo a darparu cymorth cyntaf mewn cymunedau ledled Cymru.
Cyfarfu Duges Caerloyw â gwirfoddolwyr o elusen cymorth cyntaf Cymru yn Eglwys Sant Ioan Fedyddiwr fel rhan o ymweliad â’r brifddinas, a oedd yn cynnwys ymweliadau â sawl sefydliad y mae hi’n gysylltiedig â nhw.
Derbyniwyd Ei Huchelder Brenhinol, sy’n Bencadlywydd St John Ambulance Cymru, gan Arglwydd Raglaw De Morgannwg, Mrs Morfudd Meredith, cyn cael ei chyflwyno i Paul Griffiths OBE KStJ DL, Prior St John Ambulance Cymru; Richard Paskell MBE CStJ, Prif Wirfoddolwr yr elusen, a’r Parch Ganon Sarah Jones, Offeiriad â Gofal yn Eglwys Sant Ioan.
Y tu mewn i’r eglwys, siaradodd y Dduges â gwirfoddolwyr a oedd wedi teithio o bob rhan o Gymru i fod yn rhan o’r digwyddiad a chlywodd sut yr oeddent wedi dysgu sgiliau cymorth cyntaf gyda’r elusen, yn ogystal â’r gwahanol ffyrdd y rhoddwyd y sgiliau hyn ar waith.
Yn ogystal â chwrdd â Badgers a Chadetiaid, siaradodd Ei Huchelder Brenhinol hefyd ag unigolion sy’n ymwneud â Chynllun Cadetiaid Nyrsio Tywysog Cymru, ynghyd ag oedolion ifanc, a dysgodd sut roedd eu gwirfoddoli wedi darparu profiad a sylfaen ar gyfer gyrfa yn y dyfodol yn y sector gofal iechyd.
Cyfarfu’r Dduges hefyd ag oedolion sy’n gwirfoddoli gyda’r elusen, sy’n cyflawni rolau hanfodol amrywiol i St John Ambulance Cymru, gan gynnwys y rhai sydd wedi rhoi degawdau o wasanaeth i’r elusen i ddarparu cymorth cyntaf mewn digwyddiadau, a’r rhai sy’n rhoi o’u hamser i arwain grwpiau Badgers a Chadetiaid ar draws Cymru.
Dywedodd, Paul Griffiths OBE KStJ DL, Prior i Gymru: “Roedd yn anrhydedd cwrdd â Duges Caerloyw a chyflwyno Ei Huchelder Brenhinol i drawstoriad o wirfoddolwyr ymroddedig sy’n asgwrn cefn i’n helusen.
“Rydym yn hynod ddiolchgar am yr amser a roddodd y Dduges i siarad â’n gwirfoddolwyr ac am y diddordeb a gymerodd mewn clywed am y sgiliau a’r profiadau a gawsant yn ystod eu hamser gydag St John Ambulance Cymru.”
Cyfarfu Ei Huchelder Brenhinol hefyd â Wardeniaid a gwirfoddolwyr Eglwys Sant Ioan Fedyddiwr, sy’n gwasanaethu fel ‘Eglwys y Priordy’ i’r Priordy Cymru Urdd St John. Dyma’r ail adeilad hynaf yng Nghaerdydd.
