Yn ddiweddar, trefnodd Gyrfa Cymru ddiwrnod gyrfaoedd Anghenion Dysgu Ychwanegol (ADY) unigryw ar gyfer Ysgol Crug Glas mewn partneriaeth â Heddlu Trafnidiaeth Prydeinig.
Rhoddodd y digwyddiad, a gynhaliwyd ar 15 Mawrth 2024, gyfle i fyfyrwyr ddod i gysylltiad â chyfleoedd gyrfa mewn ffordd ystyrlon.
Trefnodd Andrea John, cynghorydd ymgysylltu â busnes yn Gyrfa Cymru, sesiwn ryngweithiol yn cynnwys dau SCCH (Swyddogion Cymorth Cymunedol yr Heddlu), Jade Morgan a Kyle Flowers, o Heddlu Trafnidiaeth Prydeinig. Roedd y sesiwn wedi’i theilwra i ddarparu ar gyfer gofynion synhwyraidd myfyrwyr ag anghenion a heriau cymhleth.
Eglurodd Andrea: “Ar ôl gweithio gyda Heddlu Trafnidiaeth Prydeinig o’r blaen a gweld â’m llygaid fy hun y gwaith gwych maen nhw’n ei wneud gydag ysgolion, gofynnais a fydden nhw’n cefnogi gweithgaredd ar gyfer Ysgol Crug Glas. Roedd gweithio gyda’n gilydd i addasu’r gefnogaeth i gyd-fynd ag anghenion arbenigol y myfyrwyr yn rhan fawr o’r rheswm pam y bu’r digwyddiad hwn mor llwyddiannus. Yr ymdrechion cydweithredol hyn sydd wir yn gwneud gwahaniaeth, gan sicrhau bod myfyrwyr yn cael y cymorth pwrpasol y mae ei angen arnynt i ffynnu.”
Yn ystod y sesiwn, cafodd disgyblion y cyfle i ymgysylltu â gweithgareddau synhwyraidd amrywiol, gan gynnwys gwrando ar synau rheilffordd go iawn trwy godau QR, profi goleuadau’n fflachio, a rhoi cynnig ar wisgoedd heddlu.
Cynlluniwyd y gweithgareddau i roi dealltwriaeth ymarferol o’r rolau a’r cyfrifoldebau o fewn Heddlu Trafnidiaeth Prydeinig a’r diwydiant rheilffyrdd.
Dywedodd Mark Saunders, Athro ADY yn Ysgol Crug Glas: “Rwyf am fynegi fy niolch i Andrea, Jade a Kyle am gynnal sesiwn eithriadol. Mwynhaodd y bobl ifanc a’r staff yn fawr. Roedd yr amgylchedd dysgu yn ddifyr ac yn ymlaciol, ac roedd pawb yn cymryd rhan yn frwd yn y gweithgareddau. Roedd lefel y gefnogaeth a’r amser a roddwyd i’r disgyblion yn anhygoel.”
Yn y dyfodol, mae’r ysgol yn bwriadu ymweld â’r orsaf reilffordd i adeiladu ymhellach ar y gweithgaredd hwn a chyfoethogi profiadau dysgu’r myfyrwyr. Bydd yr ymweliad yn rhoi cyfle i fyfyrwyr ryngweithio â gweithwyr y rheilffyrdd, gan ehangu eu dealltwriaeth o bosibiliadau gyrfa o fewn y sector trafnidiaeth.
Dywedodd Jade Morgan, Swyddog Cymorth Cymunedol yr Heddlu: “Mwynheais i a Kyle gymryd rhan yn y digwyddiad hwn yn fawr ac rydym yn gyffrous i wahodd y disgyblion a’r staff i orsaf drenau Abertawe i gwrdd â’r holl staff anhygoel yno.”
I gael gwybodaeth yn ymwneud â chymorth ac arweiniad gyrfaoedd, ewch i wefan Gyrfa Cymru.