Wrth i dymor yr ŵyl agosáu, mae cynlluniau Shopmobility Sir Gaerfyrddin yn annog siopwyr i fanteisio i’r eithaf ar eu gwasanaethau symudedd, gan sicrhau y gall pawb brofi hud y Nadolig yn hwylus ac yn gysurus.
Mae cynlluniau Shopmobility sydd yng nghanol trefi Caerfyrddin a Llanelli, yn cynnig offer hanfodol, fel cadeiriau olwyn a sgwteri, i gefnogi unigolion â heriau symudedd. Mae’r gwasanaeth hwn yn werthfawr iawn yn ystod tymor prysur y Nadolig, gan helpu pobl sydd ag anghenion symudedd dros dro neu barhaol i gael mynediad at ardaloedd siopa a digwyddiadau Nadoligaidd yn haws.
Wedi’i leoli’n gyfleus ar lawr gwaelod maes parcio aml-lawr Heol y Gwyddau yng Nghaerfyrddin a Stryd Cowell yn Llanelli, mae’r gwasanaethau hyn yn cynnig mynediad a chefnogaeth hawdd i’r rhai sydd ei angen.
Dywedodd Richard Jones o Shopmobility Caerfyrddin:
“Mae ein gwasanaeth Shopmobility yn sicrhau y gall pawb, beth bynnag fo’u hanghenion symudedd, fwynhau llawenydd siopa a dathliadau’r Nadolig yn llawn. Rydym wedi ymrwymo i wneud y tymor yn fwy cynhwysol a hygyrch i bawb.”
Pwysleisiodd y Cynghorydd Edward Thomas, Aelod Cabinet dros Wasanaethau Trafnidiaeth, Gwastraff a Seilwaith, bwysigrwydd cynlluniau Shopmobility Sir Gaerfyrddin yn hyrwyddo hygyrchedd ac ysbryd cymunedol:
“Mae cynlluniau Shopmobility Caerfyrddin a Llanelli yn chwarae rhan hanfodol wrth sicrhau bod ein trefi yn parhau i fod yn hygyrch i bawb, yn enwedig yn ystod tymor prysur yr ŵyl. Mae’r gwasanaethau hyn nid yn unig yn cefnogi unigolion ag anghenion symudedd ond hefyd yn cryfhau ein cymunedau trwy alluogi cynhwysiant ac annibyniaeth. Rwy’n annog unrhyw un a allai elwa ar yr adnodd amhrisiadwy hwn i’w ddefnyddio’r Nadolig hwn.”
Mae Shopmobility yn golygu mwy na symudedd yn unig – mae’n ymwneud ag adeiladu cymunedau cryfach. Mae gwirfoddolwyr yn chwarae rhan hanfodol wrth gefnogi’r gwasanaeth, ac mae croeso bob amser i wirfoddolwyr newydd helpu i sicrhau ei lwyddiant yn ystod tymor prysur y Nadolig a thrwy gydol y flwyddyn.
Am ragor o wybodaeth am Shopmobility Caerfyrddin, neu i archebu offer, ffoniwch 01267 233699, ar gyfer Shopmobility Llanelli, ffoniwch 01554 775409.